MILANI shkatron Udinesen

Rossonerët shfaqën një lojë shumë të mirë, sidomos në pjesën e parë duke arritur të shënojnë plot katër gola.

I riu Alexandre Pato e hapi serinë e golave pas një krosimi të Giuseppe Favallit dhe e mposhti me kokë portierin mysafir.

Prania e superyllit brazilian Leite Kaka në lojë u vërejt menjëherë në lojën e Milanit. Ishte pikërisht Kaka lojtari që dyfishoi epërsinë (13’).

Krejt çka bënë lojtarët e Udineses në këtë ndeshje ishte goli i nderit i shënuar nga Antonio Di Natale në minutën e 17-të.

Mirëpo pas vetëm një minute në skenë doli sërish Pato për ta bërë rezultatin 3-1.

Pas një gjuajtje të lirë nga Pirlo, i erdhi momenti edhe mesfushorit Clarence Seedorf të shënojë. Holandezi u gjet më së miri para porte dhe topin e kthyer nga shtylla e plasoi në rrjet (43’).

Në pjesën e dytë të ndeshjes u shënua vetëm një gol nga Leite Kaka (52’), pasi që kuqezinjtë nuk kishin motivacion të shënojnë ndonjë tjetër gol.

Kjo fitore e mban Milanin në pozitën e tretë në tabelë me nëntë pikë prapa Interit që gjendet në vendin e parë dhe tre pikë prapa Juventusit që pozicionohet në vendin e dytë.