Toptan: Shqipria meriton të jetë antare e NATOS

Ashtu siç ju premtova gjatë vizitës tuaj në Turqi një vit më parë, Turqia njohu Kosovën, ratifikuam Protokollin e anëtarësimit të Shqipërisë në NATO dhe iu përgjigja ftesës tuaj për këtë vizitë zyrtare në Tiranë. Me këto fjalë kryetari i Asamblesë së madhe Kombëtare të Turqisë, Koksal Toptan ju drejtua kryetares së Kuvendit të Shqipërisë, Jozefina Topalli në takimin e zhvilluar sot në selinë e Kuvendit të Shqipërisë.
Përpara takimit të dy delegacioneve, Toptan dhe Topalli zhvilluan një takim të shkurtër kokë më kokë pa praninë e medias dhe anëtarëve të tjerë të delegacionit.

Duke vlerësuar si shumë thelbësor rolin pozitiv të Shqipërisë në paqen dhe stabilitetin rajonal, Toptan tha se anëtarësimi i Shqipërisë në NATO është një kontribut shumë i rëndësishëm jo vetëm për rajonin por edhe për paqen në kuptim më të gjerë.

Ne e dimë, tha Toptan, se Shqipëria ka ecur shumë përpara ka bërë reforma të mëdha dhe reflekton stabilitet të fortë politik dhe ekonomik. “Për të gjithë këtë progres Shqipëria meriton të jetë anëtare me të drejta të plota në NATO. Po ashtu besojmë se shumë shpejt ju do të jeni anëtarë të Bashkimit Evropian”.

Kryetarja e Kuvendit të Shqipërisë, Jozefina Topalli ndërkaq, bëri të ditur se investimet direkte turke kanë shënuar gjatë këtyre viteve të fundit një shifër rekord prej 860 milionë euro nga 135 milionë euro që kanë qenë në 2005.