Lala do të pensionohet tek Hanoveri

Drejtuesit e klubit të Hannoverit janë të gatshëm të rinovojnë kontratën me kapitenin e kombëtares shqiptare, Altin Lala, i cili aktualisht po rikuperohet nga lëndimi.
33-vjeçari ka 158 paraqitje në Bundesligë dhe 115 në Bundesligën II me Hannoverin, ku u transferua në vitin 1998 nga Borusia Fuldas.

Marrëveshja e Lalës me klubin skadon në fund të sezonit, por “të kuqtë” synojnë t’i ofrojnë atij një tjetër kontratë.

“Lala është shumë i rëndësishëm për Hanoverin dhe respektohet nga tifozët. Ai luan prej shumë vitesh me skuadrën dhe duhet të dalë në ‘pension’ këtu. Më pas synojmë që ta mbajmë për të punuar në klub”, ka thënë presidenti i klubit Martin Kind.

Kapiteni kuqezi luan me Hannoverin prej më shumë se dhjetë vitesh dhe për pesë sezone ka mbajtur shiritin e kapitenit./