Lampard: Oweni nuk i duhet Chelse-it

Mesfushori anglez Frank Lampard ka vetëm fjalë të mira për Michael Owen, por thotë se për momentin Chelsea ka mjaft opsione në sulm.
Marrëveshja e Owen me Newcastle skadon në fund të sezonit dhe klubi anglez i ka ofruar marrëveshje të re atij, por sulmuesi ende nuk ka nënshkruar.

Chelsea është një prej klubeve me të cilët është lidhur 29-vjeçari, por Lampard thotë se Owen nuk është i nevojshëm në Chelsea.

“Është e qartë se kjo është një vendim i menaxherit. Michael është futbollist i klasit, këtë ai e ka vërtetuar me golin kundër Portsmouthit në javën e kaluar. Ishte një gol i jashtëzakonshëm”, ka thënë Lampard.

“Kur është i shëndoshë ai është i shkëlqyeshëm, dhe mendoj se do të ishte një përforcim i qëlluar për secilin ekip. Por ne kemi Nicolas Anelkan dhe Didie Drogban, dhe mendoj se ata janë të mjaftueshëm”, ka deklaruar Lampard.